العَرْبِي عَاقْ
تِْجي تْحَققْ تحْمَاقْ
قلْ الزوَاجْ وْكثرْ الطلاقْ َ
هَا الصْبَاغَة هَا الزْوَاقْ
هَا البُهْتانْ هَا الٍنفَاقْ
كلْ خْرُوفْ مْن رْجْلوُ يْتعَلاقْ
وكلْ رَاسْ لازْمْلوُ حَلاقْ
ومن بَعْدْ الٍلقَا لازْمْ الفْرَاقْ
عْلاش هَداكْ يْنُوضْ يسْرَاقْ
ويْفلتْ مْن بَين لِصَابَعْ كِ الزًوَاقْ
سْمْحُو ِليه رَاهْ غِير زْلاقْ
ووَاحْد بَاعْ رَاسُو بْلا صْدَاقْ
ووَاحْد دْمْ الشْهوَة عْلى جْلدُو لصَاقْ
تِْجي تحَققْ.......... تحْمَاقْ
ووَاحْد قْتلْ واِلدِيه بْلا رْحْمَة بلا شْفاقْ
قالوُ مْسِْكينِ حمَاقْ مْسرْفاقْ
كِيفْ بْغِيتوُ هَادا نْجْمُو يْشرَاقْ
ووَاحْد فمٌو خَنْدَق ولسَانُو نَارْ تحْرَاقْ
السًمْ سْرَى فْ الِجسْمْ فِينْ الترْيَاقْ
الفسَادْ تقوًى وْلىً عِمْلاقْ
والخِيْر تقَزْمْ ورْجَعْ مُعَاقْ
كثْرُو الحرُوبْ وقَل السٍلمْ و الِوفَاقْ
قلوٌ الصْحَابْ... والٍرفَاقْ
وكثرُو المِلفًاتْ ولوْرَاقْ
ولا عَذلْ يْسَاِوي بَيْن لخْلاقْ
ْتجي تْحَققْ تحْمَاقْ
قالوُ العَرْبي عَاقْ
وخْوَا جَِزيرَة الوَاقوَاقْ
وْطلعْ للمٍْريخْ عْلى ظهَرْ البُرَاقْ
وتْمًا كتْبْ دُسْتوُرْ العُشًاقْ
وهُوَ خْرْج من السٍبَاقْ
وفْظًلْ الدْفْلة عَلْ الحْبَاقْ
وخَلا الدمُوعْ تدْفَاقْ
فأفغَانِسْتان وفْ العِراق
تجي تحقق تحماقْ
واحْد طَامَعْ فخُبْزَة ووَاحْدْ بَاغِي غِير شْدَاقْ
كثرْتْ الدٌوخَة والتبْوَاقْ
جْرَى المسْكِينْ حْتى عْيَا مَا لحَاقْ
وحْرْقاتوُ لشْوَاقْ
ومِنْ نعَاسْ وْفَاقْ
وحَكْ عَيْنُو وحَمْلاقْ
ْتفْكرْ الكِريدِي وهُوَ يْتخْنَاقْ
الله يْحْفظْ مْن المْشتَاقْ يْلا دَاقْ
ومْن المْكلخْ يْلا عَاقْ
ومْن النهَارْ لِي يْتجْمَع فِيه السًاقُ بالسًاقْ
تْجي تْحَققْ................ تْحْمَاقْ